أموالي منصة الناشرين أموالي منصة الناشرين اكتب · انشر · نمُ
الروايات

سكريبت غربه كامله أماني سيد

أنا أم لبنتين توأم، ربنا يباركلي فيهم، ومتجوزة بقالي أربع سنين. الحمد لله أنا وجوزي كنا عايشين كويس مع بعض، وعلاقتنا مستقرة، ومكنش بينا مشاكل كبيرة أو خلافات تخليني أشك فيه أو أفكر إنه ممكن يخبي عني حاجة. جوزي مسافر بقاله تلات سنين في بلد عربي، ومن يوم ما

محمدمحمدالكاتب 26 د للقراءة 0.00 المراجعات
سكريبت غربه كامله أماني سيد

 سكريبت غربه كامله أماني سيد 


 


 

سكريبت غربه كامله أماني سيد 


 

أنا أم لبنتين توأم، ربنا يباركلي فيهم، ومتجوزة بقالي أربع سنين. الحمد لله أنا وجوزي كنا عايشين كويس مع بعض، وعلاقتنا مستقرة، ومكنش بينا مشاكل كبيرة أو خلافات تخليني أشك فيه أو أفكر إنه ممكن يخبي عني حاجة.


 

جوزي مسافر بقاله تلات سنين في بلد عربي، ومن يوم ما سافر وأنا مستنية اليوم اللي يرجع فيه ونقدر نعيش مع بعض ونربي بناتنا في بيت واحد. لكن من حوالي سنه بدأت ألاحظ عليه تغيير كبير في معاملته معايا.


 

بقى حنين بشكل مش متعودة عليه، كل يوم يصحى يبعتلي رسالة صباح الخير وكلام حلو، ويسأل عليا وعلى البنات، وحتى اهتمامه بتفاصيلي زاد عن الأول. كمان بقى يبعتلي فلوس زيادة ويقولي اشتري لنفسك حاجة، ومتشيليش هم أي حاجة، وفي عيد جوازنا بعتلي مبلغ حلو وقالي هاتي لنفسك حاجة دهب تفرحي بيها.


 


 


 

وبقى يبعتلي صور حاجات كتير نفسه يشتريها، ومبقاش يناقشني في الأسعار زي الأول، لدرجة إنه وعدني إنه هيجيبلي عربية جديدة، وكنت مصدقاه وفرحانة باهتمامه، وكنت بقول لنفسي إن الغربة يمكن خلته يحس بقيمتي أكتر. ووقتها بدأت أرجع بذاكرتي لكل المواقف اللي حصلت بينا خلال السنتين اللي فاتوا، وكل مرة كنت بسأله فيها عن سبب التغيير المفاجئ في معاملته معايا، كان دايمًا يرد بنفس الإجابة: وحشتوني، نفسي أعوضكم عن غيابي، ونفسي أفرحكم.


 

وكنت بصدقه، بالعكس كنت بفرح بكلامه وبحس إن البُعد خلّاه متعلق بينا أكتر. لحد ما في يوم كنت قاعدة مع صاحبتي وبنتكلم، وفجأة قالتلي بهزار:- هو إنتِ مش ملاحظة إن جوزك اتغير أوي اليومين دول؟ ده إنتِ كل ما تحكيلي عن حاجة بيبعتهالك، يمكن بيعمل كده عشان اتجوز عليكي!


 

قالتها وهي بتضحك، لكن أنا الكلام وقف في ودني، ومقدرتش أضحك معاها. مش عارفة ليه حسيت إن هزارها ممكن يكون حقيقة، وفضلت الفكرة تلف في دماغي لحد ما قررت أتأكد بنفسي. روحت عملت قيد عائلي، ولما استلمته اكتشفت إن جوزي فعلًا متجوز من سنتين!


 

وقتها حسيت إن كل حاجة اتغيرت في لحظة، وإن كل الاهتمام والحنية والفلوس اللي كنت بفرح بيها ممكن يكون وراها سر أنا معرفهوش. والغريب إني بدل ما أواجهه فورًا، لقيت نفسي واقفة بين نا. رين؛ ن.


 

ار إني أفتح معاه الموضوع وأواجهه بالحقيقة، وساعتها غالبًا حياتنا هتتقلب، وممكن أخسر المميزات اللي بدأت أستفيد منها، خصوصًا إنه أكيد مش هيقدر يفضل يعاملني بنفس الطريقة بعد ما يعرف إني كشفت جوازه. واحساسه بالذنب هيختفى والن.


 

ار التانية إني أسكت وأعمل نفسي مش عارفة حاجة، وأفضل مستفيدة من اهتمامه والفلوس اللي بقى بيبعتها، وأسيبه مكمل في حياته التانية من غير ما أواجهه. بس في نفس الوقت كنت بسأل نفسي: هو أنا كده بضحك على نفسي؟


 

وهل أقدر أعيش مع راجل عارفة إنه متجوز عليا ومخبّي عني، وأفضل أتعامل معاه عادي كأن مفيش حاجة حصلت؟فضلت كام يوم مش عارفة أنام كويس، وكل ما يكلمني وأسمع صوته الحنين أحس إن في حاجة واقفة في زوري ومش قادرة أبلعها.


 


 

بقيت أبص لصورنا القديمة وأفتكر كلامه ليا قبل ما يسافر، وأقول لنفسي هو إمتى قدر يعيش حياة تانية وأنا هنا مستنياه كل السنين دي؟وفي يوم اتصل بيا مكالمة فيديو، وكان مبسوط وبيتكلم مع البنات، وبعد ما خلص كلام معاهم بصلي وقال:- إيه يا حبيبتي؟


 

مالك؟ حاسك مش على بعضك. حاولت أتماسك وقلتله:- مفيش، بس كنت عايزة أسألك سؤال. قال باهتمام:- اسألي يا قلبي. سكت شوية وبعدين قلتله:- إنت عمرك خبيت عني حاجة كبيرة؟اتغيرت ملامحه للحظة، لكنه رجع ابتسم وقال:- زي إيه يعني؟


 


 

هو أنا مخبي عنك إيه؟قلتله:- مش عارفة، بس بسألك لو في حاجة حصلت في حياتك وأنا معرفهاش، أو قرار أخدته من غير ما تقولي. ضحك وقال:- إنتِ بتفكري في إيه بس؟ هو أنا فاضي للكلام ده؟


 


 


 

أنا طول اليوم شغل، وبرجع أكلمكم وأطمن عليكم، وكل اللي بفكر فيه إني أرجع وأعيش معاكم. الكلام ده وجعني أكتر ما ريحني، لأن الراجل اللي قدامي كان قادر يبص في عيني ويكدب بكل سهولة، مع إن الحقيقة موجودة في ورقة رسمية أنا شايلها في درج الدولاب.


 

قفلت معاه وأنا مقررة إني مش هفتح الموضوع بالتليفون، وإنه لما ينزل إجازة لازم أسمع منه كل حاجة وش لوش. لكن اللي حصل بعد كده خلاني أغير كل حساباتي. بعدها بأسبوع تقريبًا، بعتلي رسالة بيقولي فيها إنه هيبعتلي فلوس أجهز نفسي والبنات، وإنه ناوي ينزل إجازة الشهر الجاي، وإنه عايزنا نقضي كام يوم في مكان حلو قبل ما يرجع شغله.


 

فرحت البنات جدًا لما عرفوا إن بابا قرب يرجع، وفضلوا كل يوم يسألوني فاضل قد إيه على رجوعه، وأنا كنت ببصلهم ومش عارفة أفرح زيهم ولا لأ. وفي يوم كنت بشتري شوية حاجات للبنات، قابلت واحدة أعرفها معرفة سطحية، ولما شافتني سلمت عليا وسألتني عن جوزي، ولما قولتلها إنه لسه مسافر قالتلي باستغراب:- هو لسه منزلش؟


 

أنا افتكرت إنه نزل من فترة. بصتلها وقلت:- لأ، هو مسافر، إنتِ شفتيه؟قالتلي:- لا، بس واحدة صاحبتي جوزها شغال معاه بره، وكانت بتقولي إنه نزل مصر من كام شهر وقعد فترة ورجع تاني. حسيت قلبي بيدق بسرعة، وسألتها:- إنتِ متأكدة من الكلام ده؟


 

- والله ده اللي سمعته، بس يمكن تكون لخبطت بينه وبين حد تاني. رجعت البيت وأنا مش قادرة أطلع المعلومة دي من دماغي. يعني هو متجوز من سنتين، وكمان نزل مصر وأنا معرفش؟ طب نزل إمتى؟ وقعد فين؟


 

وهل شاف مراته التانية؟ وهل كان بيكلمني وقتها ويقولي إنه مضغوط في الشغل ومش قادر ياخد إجازة؟قررت أتصل بيه وأسأله، لكن قبل ما أعمل كده لقيته هو اللي بيتصل بيا. رديت عليه، لقيته بيقولي:- حبيبتي، أنا عندي ليكي خبر حلو.- خير؟


 

قال:- أنا بفكر أجيبلكم شقة جديدة ، بدل ما تفضلي في الشقة القديمة، ولما أرجع نبقى نعيش فيها سواسكت شوية، وبعدين سألته:- وإنت لما نزلت مصر المرة اللي فاتت، كنت فين؟الصمت اللي حصل بعد سؤالي كان أطول من أي إجابة ممكن يقولها.


 


 

وبعدين رد وقال:- نزلت إمتى؟- إنت عارف أنا بتكلم عن إيه، متحاولش تلف وتدور عليا. صوته اتغير وقال:- مين قالك الكلام ده؟وقتها اتأكدت إنه فعلًا نزل، وإنه كان فاكر إن الموضوع محدش ممكن يعرفه.- يعني الكلام صح؟


 

- بصي، أنا كنت نازل كام يوم أخلص شوية مصالح، ومكنتش عايز أقولك عشان متتعبيش نفسك وتفضلي مستنياني، وبعدين أنا كنت مضغوط جدًا ومفيش وقت أشوف حد. ضحكت من غير ما يكون عندي أي إحساس بالضحك وقلتله:- حتى بناتك مكنش عندك وقت تشوفهم؟


 


 

قال بسرعة:ـ متدخليش البنات في الموضوع، أنا بعمل كل ده عشانهم. وقتها مقدرتش أتمالك نفسي وقلتله:- طب ومراتك التانية؟ كان عندك وقت تشوفها؟فضل ساكت، وأنا كنت سامعة صوت أنفاسه في التليفون، وبعد لحظات قال بصوت واطي:- إنتِ عرفتي منين؟


 


 

- يعني أعترف إنك متجوز عليا من سنه، وأعترف كمان إنك نزلت مصر من غير ما أشوفك، ولا حتى بناتك يشوفوك؟رد بعصبية:- إنتِ بتكبري الموضوع ليه؟ أنا مقصرتش معاكي في حاجة، ولا قصرت في مصاريف البيت، وعمري ما خليتك تحتاجي حاجة.


 

- أنا مكنتش محتاجة منك فلوس على قد ما كنت محتاجة أعرف أنا متجوزة مين! إنت فاكر إن الفلوس اللي بتبعتها ممكن تخليني مشوفش الحقيقة؟- أنا كنت ناوي أقولك، بس كنت مستني الوقت المناسب.- والوقت المناسب ده إمتى؟ بعد ما أجيبلك عيالك وأسلمك حياتي تاني؟


 

ولا بعد ما تخلص كل اللي إنت عايزه؟لكنه فجأة قال جملة خلتني أسكت تمامًا:- أنا مش هقدر أطلقها يا حبيبتي، ومش هقدر أسيبك إنتِ كمان، وإنتِ لازم تفهمي إن وجودها في حياتي مش معناه إن مكانتك قلت عندي.


 

وقتها عرفت إن المشكلة مش في إنه اتجوز وبس، المشكلة إنه كان مقرر يعيش حياته بالشكل اللي هو عايزه، وإحنا الاتنين مطلوب مننا نقبل بالأمر الواقع. وقبل ما أقفل معاه سألته سؤال واحد:- هي عارفة إنك متجوز وعندك بنتين مني؟- أيوه، عارفة. وهنا كانت الصدمة الأكبر.


 

.. لأن واضح إن الست دي كانت عارفة بوجودي وبناتي، بينما أنا اللي كنت آخر واحدة تعرف إن جوزي بقى عنده زوجة تانية. حسيت وقتها إن الإهانة مش بس في إنه اتجوز عليا وخبى، لكن في إن في واحدة تانية كانت عارفة إني موجودة، وعارفة إن عنده بنتين، ويمكن كانت بتسمع أخباره معايا وهو بيكلمني، وأنا قاعدة في بيتي مش عارفة إن في حياة كاملة تانية هو عايشها بعيد عني.


 

قلتله بصوت مخنوق:

\- وهي كانت عارفة من إمتى؟قال:

\- من أول ما اتعرفنا.\- يعني إنت كنت بتتكلم معاها عني وعن بناتك؟\- أيوه، ومش شايف إن في مشكلة في كده.\- وهي كانت موافقة تتجوز راجل متجوز وعنده أسرة؟\- أيوه، هي كانت عارفة ظروفي من البداية. ضحكت بمرارة وقلتله:


 

\- غريبة أوي! يعني هي كانت عارفة كل حاجة، وإنت كنت حريص إنك تخبي عني كل حاجة، وكنت بتكلمني كل يوم وتقوللي وحشتوني ونفسي أعوضكم عن غيابي، وفي نفس الوقت كنت بتعيش معاها حياتك عادي!قال بنفاد صبر:

\- خلاص بقى، أنا مش عايز أفضل في التحقيق ده.


 


 

أنا عملت اللي شايفه صح، ومش هقبل إنك تحاسبيني على حاجة أنا شرعًا وقانونًا من حقي أعملها. قلتله:

\- وأنا كمان من حقي أعرف الحقيقة، ومن حقي أقرر إذا كنت عايزة أكمل حياتي معاك بالشكل ده ولا لأ.


 

رد بسرعة:

\- وإنتِ عايزة توصلي لإيه؟ عايزة تطلقي؟السؤال خلاني أسكت، مش عشان معنديش إجابة، لكن عشان كنت محتاجة أفهم هو فعلًا متخيل إن بعد كل اللي عرفته ده هقدر أرجع أتعامل معاه بنفس الطريقة. قلتله:


 


 

\- أنا مش هاخد قرار دلوقتي، لكن متفتكرش إنك لما تنزل هتلاقيني مستنياك بنفس المشاعر القديمة. قفلنا المكالمة، ومن ساعتها اختفى الاهتمام اللي كان مغرقني بيه طول السنة اللي فاتت. مبقاش يبعت رسائل الصبح، ولا يسألني كل شوية محتاجة إيه، وحتى الفلوس اللي كان بيبعتها زيادة بقت على قد مصاريف البيت والبنات.


 


 


 

وقتها فهمت إن جزء كبير من اهتمامه كان نابع من إحساسه بالذنب، وإنه كان بيحاول يعوضني عن حاجة أنا حتى مكنتش أعرف إنها حصلت. لكن اللي وجعني أكتر إنه بعد حوالي أسبوع اتصل بيا وقال:

\- أنا عايزك تجهزي نفسك والبنات، أنا هكون عندكم بعد عشر أيام.


 

سألته:

\- وإنت جاي لوحدك؟اتردد شوية وقال:

\- أيوه، هاجي لوحدي، بس عايز أتكلم معاكي في موضوع مهم. قلتله:

\- موضوع إيه؟قال:

\- أنا عايزك تتعرفي على مراتي، ونحاول نخلي الدنيا بينكم كويسة، هي ملهاش ذنب في أي حاجة حصلت.


 

وقتها حسيت إني مش مصدقة اللي بسمعه، هو مش بس متوقع مني إني أتقبل جوازه، ده كمان عايزني أستقبل مراته وأتعرف عليها وكأننا أصحاب!قلتله:

\- إنت بتتكلم بجد؟ إنت عايزني أقابل الست اللي كانت عارفة إني موجودة، وعارفة إن عندك بنتين، ورضيت تدخل حياتك من غير ما يكون عندي أي علم؟


 

قال:

\- هي مش غلطانة، أنا اللي مخبي عنك، وبعدين أنا مش عايز مشاكل، نفسي لما أنزل نكون كلنا على قلب واحد. قلتله:

\- على قلب واحد إيه؟ إنت متخيل إننا عيلة واحدة وإحنا أصلًا عمرنا ما اتقابلنا؟ أنا حتى معرفش اسمها ولا شكلها!


 

قال:

\- اسمها نجلاء، وهي ست محترمة وطيبة، وأنا متأكد إنك لو اتعاملتي معاها هتحبيها. قفلت المكالمة من غير ما أرد، وفضلت أفكر في طلبه الغريب. وبعد يومين، لقيت رسالة من رقم غريب، ولما فتحتها اتفاجئت إنها من نجلاء نفسها، وكانت كاتبة:


 

«مساء الخير، أنا نجلاء مرات أحمد، عارفة إنك أكيد متضايقة مني، وعارفة إن معرفتك بالموضوع بالطريقة دي كانت صعبة، بس أنا حابة نتكلم ونتعرف على بعض قبل ما أحمد ينزل، لأن في موضوع مهم لازم تعرفيه مني أنا شخصيًا».


 

فضلت باصة للرسالة ومش فاهمة هي عايزة مني إيه، وإيه الموضوع اللي ممكن تكون عايزة تقولهولي، خصوصًا إنها ختمت كلامها بجملة خلتني أحس إن جواز جوزي مش هو السر الوحيد اللي مخبيه عني. فضلت باصة للرسالة شوية، وبعدين قررت أرد عليها وأعرف هي عايزة مني إيه، فكتبتلها:


 

\- اتفضلي، أنا سامعاكي. ملحقتش أحط الموبايل من إيدي حتى لقيتها بتتصل بيا، رديت عليها، وسمعتها بتقول بصوت هادي:

\- إزيك؟ أنا عارفة إنك متضايقة، بس صدقيني أنا مكنتش السبب في إن أحمد يخبي عنك جوازنا، هو اللي اختار يعمل كده. قلت لها ببرود:


 


 

\- تمام، وإيه الموضوع المهم اللي عايزة تقوليهولي؟قالت:

\- بصي، أنا مش عايزة علاقتي بأحمد تتأثر بالمشاكل اللي بينكم، خصوصًا إن أنا كمان ليا بيت وحياة معاه، ومش من مصلحتي إنكم تفضلوا على خلاف. استغربت طريقتها في الكلام، لكنها كملت:


 

\- أحمد حكالي عنك كتير، وعن بناته، وأنا عمري ما اعترضت إنه يصرف عليكم أو يهتم بيكم، بالعكس أنا كنت دايمًا بقوله إن بناته لازم يكونوا في أولوياته. سكتت لحظة وبعدين قالت:

\- بس أنا كمان عايزة أعيش حياة طبيعية، مش كل ما أحمد ينزل مصر يروح يقعد عندكم ويسيبني لوحدي، أنا اتجوزته عشان يبقى ليا زوج، مش عشان أفضل مستنياه زي أي واحدة ملهاش حياة.


 


 

حسيت إن كلامها مستفز، لكن حاولت أسيطر على نفسي، لحد ما قالت الجملة اللي فعلًا وجعتني:

\- وبصراحة أنا شايفة إنك لازم تتقبلي الوضع، أحمد مش هيقدر يفضل طول عمره عايش على تليفونات ومصاريف، هو محتاج زوجته تكون جنبه، وإنتِ عندك بناتك وحياتك في مصر، يعني كل واحدة فيكم ليها وضعها.


 


 


 

ضحكت بمرارة وقلت:

\- زوجته؟ تقصدي إنتِ؟قالت:

\- إحنا الاتنين زوجاته، ومش هينفع نتعامل كأن واحدة فينا مش موجودة. قلت لها:

\- وأنا عمري ما أنكرت إنك موجودة، أنا بس مستغربة إنك بتكلميني وكأنك صاحبة حق عندي، وكأن المطلوب مني أرتبلك حياتك مع جوزي وأراعي مشاعرك كمان!


 

ردت بنبرة بدأت تفقد هدوءها:

\- أنا مش بطلب منك حاجة صعبة، أنا بس عايزة الأمور تمشي من غير مشاكل، وأحمد قاللي إنه هيحاول يقنعك تيجي تزورينا، ويمكن بعد كده تفكري تنقلي إقامتك عنده. هنا فهمت هي عايزة إيه، مش مجرد تعارف ولا كلام طيب، دي عايزة تضمن إن وجودي مش هيأثر على حياتها اللي رتبتها مع أحمد.


 

قلت لها:

\- هو أحمد قالك إني هسافر أعيش معاكم؟قالت بثقة:

\- أيوه، هو شايف إن ده الحل الأفضل، وإنتِ كمان المفروض تفكري في مصلحة بناتك. رديت عليها:

\- طب وإنتِ شايفة إن مصلحتهم إنهم يعيشوا مع واحدة أبوهم مخبي عن أمهم إنه متجوزها؟


 

!قالت بضيق:

\- أنا مش مسؤولة عن تصرفات أحمد، وبعدين أنا مش هقدر أعيش في بيت واحد معاكِ، أكيد إنتِ فاهمة قصدي. وقتها ابتسمت بسخرية وقلت:

\- متقلقيش، أنا أصلًا مش بفكر أعيش معاكي في بيت واحد. وبعدين كملت وأنا بحاول أتكلم بهدوء:


 

\- بس فيه حاجة لازم تفهميها، أنا مش هقبل أبقى زوجة تانية في حياة جوزي، ولا هقبل أتعامل مع الوضع كأن ده شيء طبيعي اتفرض عليا وخلاص. قالت:

\- بس إنتِ كده بتظلــ,,ـــــمي أحمد، هو مش مقصر معاكي. قلت لها:


 

\- أنا أولى منك إني أسافر معاه وأعيش جنبه، وأولادي يتربوا في حــ,,ـــــضن أبوهم، مش المفروض إني أنا اللي أكون بعيدة وهو يدي الحق ده لواحدة تانية! أنا اللي استنيته تلات سنين، وأنا اللي شاركته حياته من أول يوم، وأنا اللي خلفت منه بنتين، وكان من حقي أكون معاه وأعيش معاه، لكنه اختار يديكي المكان ده ويحرمني منه من غير حتى ما يديني فرصة أقرر.


 


 

سكتت، فاستغليت سكوتها وكملت:

\- إنتِ عايزة تعرفي أنا زعلانة منك ليه؟ مش عشان اتجوزتي راجل متجوز، دي مسؤوليتك وإنتِ حرة في اختياراتك، لكن عشان إنتِ كنتِ عارفة إن ليه زوجة وبنات، وكنتِ عارفة إنه بيكدب عليا، ومع ذلك شايفة إن المشكلة دلوقتي إني ممكن أرفض أتقبل وجودك!


 

قالت بعصبية:

\- أنا مش هقبل إنك تحسسيني إني أخدت منك حاجة، أحمد هو اللي قرر يتجوزني، وأنا مش هسيب حقي فيه عشان إنتِ مش متقبلة الموضوع. قلت لها:

\- وأنا كمان مش هتنازل عن حقي في إني أعيش حياة واضحة ومحترمة، ومش هقبل إن حد يحددلي مكاني في حياة جوزي بالنيابة عني.


 


 

وقبل ما أقفل قالتلي:

\- طب لما أحمد ينزل، هتعملي إيه؟ هتطلبي منه يطلقني؟رديت عليها:

\- أنا مش هطلب منه يطلقك، أنا هطلب منه يحدد هو عايز إيه، لأن أنا مش هفضل معلقة حياتي على مزاجه، ومش هقبل أعيش على الفتات اللي هو بيقررهولي.


 


 


 

قفلت معاها، وبعدها بدقايق لقيت أحمد بيتصل بيا، واضح إنها حكتله المكالمة كلها. أول ما رديت قال بعصبية:

\- إنتِ كلمتي نجلاء وقلتي لها إيه؟قلتله:

\- قلتلها الحقيقة اللي إنت مش عايز تسمعها، إني مش موافقة على الوضع ده، ومش هقبل أعيش زوجة تانية في حياة راجل أنا مراته من قبل ما يعرفها.


 

قال:

\- إنتِ بتتكلمي كأنك مش عايزة تكملي معايا!قلتله:

\- أنا عايزة أكمل مع جوزي، مش عايزة أكمل مع راجل بيقرر يعيشني في بلد لوحدي، ويعيش مراته التانية جنبه، وبعد كده يطلب مني أكون متفهمة وأراعي ظروفه!وساعتها قال جملة خلتني أكتشف إنه كان مرتب لكل حاجة من غير ما يرجعلي:


 

\- بصي، أنا خلاص اتفقت مع الشركة إني أنقل إقامتي هنا، ونجلاء مش هتقدر ترجع تعيش في مصر، يعني مفيش حل غير إنك تتأقلمي مع الوضع الجديد. وقتها سألته بهدوء:

\- يعني إنت كنت ناوي تنقل إقامتك وتسيبني أنا وبناتك هنا، وتبلغني بعد ما كل حاجة تخلص؟


 

قال:

\- أنا كنت بجهز مستقبلي ومستقبلنا كلنا. قلتله:

\- لأ يا أحمد، إنت كنت بتجهز مستقبلك إنت ونجلاء، أما أنا وبناتك فكنت سايبنا مستنيين قرارك!فضل ساكت شوية، وبعدين قال بنبرة عصبية:

\- إنتِ ليه مصممة تصعبي كل حاجة؟


 

أنا بقولك هنعيش كلنا كويس، وهفضل أصرف عليكم وأوفرلكم كل اللي تحتاجوه، إيه المشكلة بقى؟قلتله:

\- المشكلة إنك فاكر إن الفلوس ممكن تعوضني عن وجودك، وإنك لما تبعتلي مبلغ زيادة كل شهر أبقى أنا كده مش من حقي أطلب أعيش مع جوزي!


 

إنت فاكر إن بناتك محتاجين فلوسك بس؟ دول محتاجين أبوهم، محتاجين يصحوا يلاقوه جنبهم، ويخرج معاهم، ويحضر أعياد ميلادهم، ويشوفهم وهما بيكبروا. قال:

\- وأنا هفضل أنزل إجازات وأشوفهم. قلتله:

\- إجازات إيه؟ وإنت حتى لما نزلت قبل كده مخدتش بالك إنك تشوفهم!


 

كنت في مصر ومراتك وبناتك ميعرفوش إنك موجود، وكنت بتقضي وقتك مع حياتك التانية!رد بضيق:

\- خلاص بقى، هتفضلي تعايريني بالموضوع ده كل شوية؟قلتله:

\- دي مش معايرة يا أحمد، دي حقيقة إنت بتحاول تهرب منها. وفجأة قال:


 


 

\- طب إنتِ عايزاني أعمل إيه دلوقتي؟ أطلق نجلاء يعني؟ أنا مش هعمل كده، ومش هظلــ,,ـــــمها عشان أرضيكي. قلتله:

\- وأنا طلبت منك تطلقها؟ أنا بقولك إني مش هقبل أكون الزوجة اللي على الهامش، اللي تستنى لما تخلص وقتك مع مراتك التانية عشان تفتكر إن عندك بيت وبنات في مصر.


 

قال:

\- يبقى الحل إنك تيجي تعيشي معايا. قلتله:

\- أنا مستعدة أسافر وأعيش معاك، وده كان المفروض يحصل من زمان، لكن مش هسافر عشان أعيش في بيت إنت ومراتك مختارين نظام حياتكم فيه، وأنا أبقى الضيفة اللي لازم تراعي وجودها.


 


 

أنا عايزة أعيش مع جوزي وبناتي، مش عايزة أدخل في منافسة مع واحدة تانية على وقتك واهتمامك. قال:

\- يعني إنتِ رافضة تيجي؟قلتله:

\- أنا رافضة الطريقة اللي إنت عايزني أجي بيها، رافضة إنك تاخد كل قرارات حياتنا من غير ما ترجعلي، ورافضة إنك تحسسني إن وجودي في حياتك مجرد مسؤولية مالية بتقوم بيها.


 


 

قفلنا المكالمة بعد نقاش طويل، ومن يومها بقى بيتعامل معايا بجفاء واضح، وكل ما أكلمه عن رجوعه أو سفرنا معاه يغير الموضوع. لحد ما في يوم لقيته باعتلي رسالة بيقولي فيها إنه حجز تذاكر سفر ليه وللبنات، وإنه هييجي ياخدهم معاه يقضوا فترة إجازة هناك. استغربت وسألته:


 

\- وإنت ليه حجزت للبنات بس؟قال:

\- عشان إنتِ لسه مش محددة موقفك، وأنا مش هحرم بناتي من إنهم يعيشوا معايا ويشوفوا البلد اللي أنا فيها. قلتله:

\- يعني إنت عايز تاخد بنتين صغيرين وتسافر بيهم وتسيب أمهم هنا؟قال:

\- ما إنتِ ممكن تيجي بعدين، لما تهدي وتفكري بعقل.


 

وقتها حسيت إنه بيحاول يضغط عليا من نقطة ضعفي، عارف إن أكتر حاجة ممكن تكسرني إني أبعد عن بناتي، وإنه يخليني أوافق على أي وضع لمجرد إني أفضل جنبهم. قلتله:

\- بناتي مش وسيلة ضغط عليا يا أحمد، ولو إنت عايز تشوفهم أنا عمري ما همنعك، لكن مش هقبل إنك تاخدهم مني وتسافر بيهم عشان تجبرني أوافق على حاجة أنا رافضاها.


 

رد بعصبية:

\- إنتِ بتشككي فيا؟ دول بناتي زي ما هما بناتك!قلتله:

\- أيوه، بناتك، لكن أنا أمهم، ومش هقبل إنك تتصرف في حياتهم ومستقبلهم من غير اتفاق بينا. ومن ساعتها وأنا بقيت حاسة إن الموضوع خرج من مجرد جواز تاني مخبيه عني، وبقى محاولة منه إنه يفرض عليا حياة أنا مرفضتهاش بس، دي أنا حتى مكنتش أعرف إنها بتتجهز من ورايا.


 

والأصعب إن أهلي لما حكيتلهم، والدتي قالتلي:

\- يا بنتي فكري كويس، ده جوزك وأبو بناتك، ولو هتقدري تسافري وتعيشي معاه يبقى أحسن ما تفضلي بعيدة عنه. لكن أنا سألتها:

\- طب ونجلاء؟ هروح أعيش معاها إزاي؟ وإيه اللي يضمنلي إنه مش هيكرر نفس اللي عمله معايا، ويخبي عني قرارات تانية؟


 

ومكنتش لاقية إجابة. لحد ما أحمد اتصل بيا في يوم وقال:

\- أنا نازل مصر آخر الأسبوع، وعايز لما أوصل نقعد كلنا ونتكلم، ومش عايز أسمع كلمة مش هينفع قبل ما تسمعيني للآخر. سألته:

\- وهنقعد فين؟قال:

\- في البيت طبعًا، أنا جاي عشان أشوف بناتي وأحل المشكلة اللي بينا.


 


 

قفلت معاه، لكن قبل ما يرجع بيوم واحد، حصل موقف مكنتش عاملة حسابه. نجلاء بعتتلي رسالة تانية، وطلبت تقابلني لوحدنا قبل ما أحمد يوصل، وقالتلي إنها عايزة تحكيلي حاجة تخصه، وإنها لو مقلتهاش دلوقتي ممكن أندم بعد كده.


 

وساعتها بدأت أسأل نفسي: هو إيه اللي نجلاء تعرفه عن أحمد وأنا لسه معرفهوش؟فضلت مترددة أرد عليها ولا لأ، لكن فضولي غلبني، خصوصًا إنها قالت إن في حاجة لو معرفتهاش ممكن أندم بعد كده.


 


 

اتصلت بيها واتفقت معاها نتقابل في كافيه قريب من البيت، ولما وصلت لقيتها قاعدة مستنياني، وكانت هادية جدًا، لكن واضح عليها التوتر. سلمت عليها وقعدت، فقالتلي:

\- أنا عارفة إنك مستغربة إني طلبت أقابلك، بس في حاجات لازم تعرفيها قبل ما أحمد يوصل. قلتلها:

\- اتفضلي، أنا سامعاكي.


 


 

قالت:

\- بصي، أنا مش جاية أقولك إني ندمانة على جوازي من أحمد، ولا جاية أطلب منك تسيبيهولي، أنا اتجوزته وأنا عارفة إنه متجوز وعنده بنتين، وكنت موافقة على ده من البداية. بصتلها باستغراب، فقالت:

\- بس في حاجة أحمد مقلهالكِش، وهو بيحاول يقنعك إنك تسافري وتعيشي معاه، ودي مش الحقيقة كاملة.


 

سألتها:

\- يعني إيه؟قالت:

\- أحمد مش ناوي تعيشي معاه في نفس البيت، هو ناوي يجيبلك شقة قريبة مننا، وتفضلي إنتِ في شقتك وأنا في شقتي، وهو يقسم وقته بين البيتين. حسيت إن الكلام مش غريب عليا أوي، لكن اللي ضايقني إنها بتتكلم عن ترتيبات حياتي كأنها أمر واقع.


 

قلتلها:

\- وهو إنتِ عرفتي منين إنه مش ناوي نعيش في بيت واحد؟قالت:

\- عشان إحنا اتكلمنا في الموضوع ده، وأنا رفضت إنه يجيبك تعيشي معايا، وقلتله إن كل واحدة فينا لازم يكون ليها بيتها وخصوصيتها.


 

ضحكت بمرارة وقلت:

\- يعني إنتِ اللي هتحددي أنا أعيش فين؟قالت بسرعة:

\- لأ، أنا مش بحددلك حاجة، أنا بقولك اللي حصل بينا. وبعدين قربت مني وقالت:

\- وفي حاجة تانية، أحمد كان وعدني إنه بعد ما يستقر وضعنا هناك، هياخد قرار إنه يخلي البنات ييجوا يعيشوا معاه فترة طويلة، وأنا مكنتش معترضة، بالعكس كنت شايفة إن ده حقه.


 

هنا قلبي اتقبــ,,ـــــض وسألتها:

\- يعني إنتِ كنتِ عارفة إنه ناوي ياخد بناتي مني؟قالت:

\- هو قالي إنه هيحاول يقنعك، وإنك ممكن تفضلي في مصر فترة لحد ما ترتبي أمورك. بصتلها وأنا مش مصدقة، وقلت:

\- يعني أنا أسافر لوحدي بعدين، وبناتي يروحوا يعيشوا معاه ومعاكي، وأنا أفضل مستنية لما هو يقرر إني أكون موجودة في حياتهم؟


 

قالت:

\- أنا مش عايزة أخد مكانك، بس أنا كمان عايزة أعيش حياتي مع جوزي، ومش عايزة أفضل حاسة إن وجودك هيمنعني أكون زوجة طبيعية. وقتها حسيت إن الكلام بقى أكبر من مجرد خلاف بين زوجتين، لأن أحمد كان بيرسم مستقبل بناتي وحياتي من غير ما يرجعلي.


 

قلتلها:

\- طيب هو قالك إيه عني؟ قالك إني هسافر وأوافق على كل ده؟قالت:

\- هو كان متأكد إنك في الآخر هتوافقي، خصوصًا إنه بيصرف عليكي كويس ومش مقصر في حاجة. الجملة دي بالذات خلتني أقف مكاني، لأن نفس الفكرة اللي كنت حاسة بيها طلعت موجودة عندهم هما الاتنين.


 


 

قلت لها:

\- يعني هو كان فاكر إن الفلوس اللي بيبعتها كفاية تخليني أتنازل عن حقي في جوزي وبيتي وبناتي؟قالت:

\- أنا مش عارفة هو بيفكر إزاي، بس أنا حبيت تعرفي قبل ما تاخدي أي قرار. سألتها:

\- وفي حاجة تانية؟اترددت شوية، وبعدين قالت:

\- أيوه، في حاجة أهم.


 

أحمد كان بيقوللي إنه مش عايز يخلف تاني، وإنه مكتفي ببناته، وإنه مش عايز مسؤوليات زيادة. استغربت وقلت:

\- وإيه علاقة ده بيا؟قالت:

\- هو قالي إنه مش عايزك تخلفي تاني، وإنه لما تيجي تعيشي هناك هيكون لازم تتفقي معاه على الموضوع ده.


 


 

وقتها حسيت إن الأرض بتتهز من تحتي، مش عشان موضوع الخلفة نفسه، لكن عشان اكتشفت إن أحمد بيتفق على تفاصيل حياتي كلها مع واحدة تانية، وأنا آخر واحدة تعرف. قمت من مكاني وقلت:

\- أنا مش عارفة أشكرك ولا أقولك إيه، بس واضح إن أحمد مش سايبلي حتى حق إني أقرر أعيش إزاي.


 


 

قالت:

\- أنا عارفة إنك زعلانة، بس صدقيني أنا كمان مش عايزة مشاكل. بصتلها وقلت:

\- إنتِ اخترتي تدخلي حياة راجل متجوز، ودي كانت مسؤوليتك، لكن أنا مش مسؤولة إني أريحك على حساب نفسي. ومش هقبل إنك أو هو ترسموا مستقبل بناتي من غيري.


 

رجعت البيت وأنا حاسة إن كل كلمة سمعتها كانت بتأكدلي إن المشكلة أكبر بكتير مما كنت متخيلة. وبالليل، أحمد وصل مصر، واتصل بيا وقال إنه جاي البيت الصبح بدري عشان يقعد معايا ومع البنات. تاني يوم، أول ما دخل البيت، البنات جريوا عليه وحــ,,ـــــضنوه، وكان واضح إنه مشتاق لهم فعلًا، وفضل يلعب معاهم ويبوسهم، وأنا واقفة بتفرج عليهم وقلبي واجعني.


 

بعد ما البنات دخلوا أوضتهم، بصلي وقال:

\- وحشتيني. قلتله بهدوء:

\- وإنت كمان، بس واضح إن في حاجات كتير اتغيرت من آخر مرة شفتك فيها. قعد قدامي وقال:

\- أنا عايز نبدأ من جديد، وننسى اللي فات. قلتله:


 

\- قبل ما نتكلم عن البداية الجديدة، أنا عايزة أعرف إنت كنت ناوي تعمل إيه بالظبط في حياتي وحياة بناتك؟اتغيرت ملامحه وسألني:

\- إنتِ قابلتي نجلاء؟قلتله:

\- أيوه، وعرفت منها حاجات كتير، وعايزة أسمعها منك إنت كمان.


 

اتنهد وقال:

\- بصي، أنا مش عايز أضيع وقتنا في كلام كتير، أنا قررت إن البنات يسافروا معايا، وإنتِ تيجي بعد ما تخلصي شوية إجراءاتك. بصتله وقلت:

\- لأ يا أحمد، البنات مش هيسافروا من غيري، وأنا مش هسافر عشان أعيش في شقة جنب مراتك وأفضل مستنية إمتى ييجي دوري في حياتك.


 

رد بعصبية:

\- يبقى إنتِ كده مش عايزة تحافظي على بيتك!قلتله:

\- لأ، أنا بحاول أحافظ على نفسي من إنك تضيعني أكتر من كده. أنا مش رافضة السفر، أنا رافضة أكون آخر واحدة ليها رأي في حياتها. أحمد اتعصب من كلامي، وقام من مكانه وقال:

\- يعني إنتِ عايزة إيه بالظبط؟


 

أنا مش فاهمك! اتجوزت نجلاء، وده حصل خلاص، ومش هقدر أرجع في اللي عملته، وفي نفس الوقت مش هسيبك إنتِ وبناتي، أعملك إيه أكتر من كده؟قلتله:

\- أنا مش عايزة منك أكتر من إنك تكون واضح معايا، بس واضح إنك مش شايف إنك غلطت أصلًا.


 

إنت شايف إنك عملت اللي يريحك، والمفروض إحنا نتأقلم مع اختياراتك. قال:

\- طب ما أنا جاي أقولك تعالي عيشي معايا، إيه اللي يمنعك؟قلتله:

\- اللي يمنعني إنك مش بتدعيني أعيش معاك كزوجة، إنت بتعرض عليا أعيش في شقة لوحدي جنب مراتك، وإنت تقسم وقتك بينا، وأنا مش هقبل أعيش العمر كله مستنية جوزي يخلص من بيت عشان ييجي البيت التاني.


 

قال:

\- يعني إنتِ عايزاني أطلق نجلاء؟قلتله:

\- لأ، أنا مش هطلب منك تطلقها، زي ما مش هقبل إنك تطلب مني أتقبل وضع أنا مش قادرة أعيش فيه. إنت حر في اختياراتك، وأنا كمان من حقي أختار. سكت شوية، وبعدين قال:

\- طب والبنات؟ هتحرميهم من أبوهم؟قلتله:


 


 

\- أنا عمري ما هحرمهم منك، لكن مش هسمح إنك تستخدمهم عشان تضغط عليا. إنت أبوهم، ومن حقك تشوفهم وتشارك في تربيتهم، لكن مش من حقك تاخدهم من حــ,,ـــــضني وتقرر مستقبلهم لوحدك. رد بعصبية:

\- أنا كنت فاكر إنك هتكوني أذكى من كده، وهتفهمي إن مصلحتك إنك تفضلي معايا.


 


 

وقتها بصتله وقلت:

\- أنا كنت فاكرة إنك بتحبني، وإن كل اللي بتعمله عشاني كان من حبك ليا، لكن اكتشفت إنك كنت بتحاول تشتري سكوتي، وده أكتر شيء وجعني. فضل ساكت، وبعدها قال:

\- أنا مش هفضل أتحايل عليكي، فكري كويس، لأن أنا مش هقدر أعيش حياتين وأفضل أرضي كل واحدة فيكم على حساب التانية.


 

قلتله:

\- محدش طلب منك تتحايل، أنا بس كنت مستنية منك تحترم حقي في الاختيار زي ما احترمت حقك في إنك تختار تتجوز. ومشي من البيت، ومن ساعتها بقينا بنتكلم في أضيق الحدود، وكل كلامنا بقى عن البنات ومصاريفهم.


 

بعد كام يوم، رجع يكلمني وقال إنه عايز نقعد مرة تانية، وإنه مستعد يسمعني للآخر. اتقابلنا، والمرة دي كان أهدى، وقال:

\- أنا عارف إني غلطت لما خبيت عنك، بس كنت خايف أخسرك، وكنت متأكد إنك مش هتوافقي على جوازي من نجلاء.


 

قلتله:

\- وإنت شايف إن إخفاء الحقيقة كان هيخليني أفضل معاك؟قال:

\- أنا كنت بحاول أحافظ على بيتي. قلتله:

\- لأ يا أحمد، إنت كنت بتحافظ على حياتك بالشكل اللي يناسبك، حتى لو على حسابي. أنا لو كنت عرفت من الأول، كان يبقى ليا حق أقرر أكمل أو لأ، لكن إنت سلبتني الحق ده، وفضلت تسيبني مستنياك تلات سنين، وأنا فاكرة إننا بنستنى بعض.


 

وبعدين قلتله:

\- أنا مش هقدر أرجع أعيش معاك بنفس الطريقة، ومش هقدر أكون زوجة تانية في حياتك، ولا هقبل إن بناتي يبقوا جزء من اتفاقات إنت ونجلاء بتعملوها من ورايا. سألني:

\- يعني إنتِ عايزة الطلاق؟اترددت لحظة، وبعدين قلت:


 

\- أنا مش عايزة أخسر أبو بناتي، لكن كمان مش عايزة أخسر نفسي. لو إنت مش قادر تديني حياة زوجية واضحة ومستقرة، يبقى الأفضل ننفصل باحترام، ونفضل متفقين على كل ما يخص بناتنا. حاول يقنعني إني أستنى، وقال إن الوقت ممكن يغير رأيي، لكن المرة دي كنت حاسمة، وطلبت منه يسيبلي فرصة أفكر بعيد عن ضغطه.


 


 

عدت أيام، ولقيته بدأ يتصل بيا أكتر، ويبعتلي رسائل فيها كلام عن الذكريات وعن الأيام الحلوة اللي عشناها، لكن كل ما أفتكر إنه كان بيكلمني من مصر وأنا فاكرة إنه في الغربة، كنت بحس إن الثقة اللي بينا اتكسرت ومش هترجع بسهولة.


 

وفي الآخر اتفقنا ننهي الجواز بالتراضي، مع ضمان حقوقي وحقوق البنات، واتفقنا كمان إنه يفضل مسؤول عن مصاريفهم وتعليمهم، وإنه يشوفهم بانتظام من غير ما يدخلهم في خلافاتنا. أما نجلاء، فمبقتش بيني وبينها أي علاقة، ولا حاولت أتواصل معاها تاني.


 


 

وبعد فترة، أحمد سافر ورجع لحياته، وأنا فضلت مع بناتي، وبدأت أرتب حياتي من جديد، وأتعلم إزاي أكون أم وأب لنفسي ولهم من غير ما أحسسهم إنهم محرومين من حاجة. والغريب إن بعد الانفصال بفترة، رجع أحمد يحاول يتواصل معايا بنفس الطريقة القديمة، كلام حلو واهتمام ووعود، لكن المرة دي مكنتش بتأثر بالكلام، لأن اللي اتكسر جوايا مكنش مجرد زعل من جوازة تانية، ده كان إحساسي بالأمان معاه.


 


 

وفي النهاية، أنا مش ندمانة إني اخترت نفسي، ولا شايفة إن كل ست لازم تختار الطلاق لو جوزها اتجوز عليها، لكن شايفة إن كل واحدة من حقها تعرف الحقيقة وتقرر بنفسها، مش تعيش سنين في وهم حد تاني رسمهولها.


 

يمكن كنت هقدر أستحمل وجود زوجة تانية لو عرفت الحقيقة من البداية واخترت بنفسي، لكن اللي مقدرتش أستحمله إن جوزي حرمني حتى من حق الاختيار، وافتكر إن الفلوس والهدايا ممكن يعوضوني عن كذبة عشت فيها سنين.

 

تابع جديد محمد

اختر إشعارات الموقع أو البريد أو الاثنين. الزائر يقدر يشترك ببريده دون تسجيل حساب.

أعجبك المقال؟

شاركه مع من يهمه الأمر

المزيد
الإبلاغ عن المقال

لو لاحظت مشكلة في المحتوى، أرسلها لفريق المراجعة. لن تظهر بياناتك لكاتب المقال أو للقراء.

سجّل الدخول لإرسال بلاغ

النقاش

التعليقات (0)

فكرة تضيفها، أو سؤال يفتح حوارًا.

اضف تعليق
تحميل...

الرجاء تسجيل الدخول لتتمكن من التعليق